Mar 7 | JAE | STEP | Ma Parisai to biŋsutau ŋagêdô, taŋ sêmêŋ aŋga Jerusalem naŋ, sêkac sa dêdêŋ Jesu sêja.

Mark 7

Lau ŋanô nêŋ mêtê

(Mat 15:1-9)

1 Ma Parisai to biŋsutau ŋagêdô, taŋ sêmêŋ aŋga Jerusalem naŋ, sêkac sa dêdêŋ Jesu sêja. 2 Ma sêlic ênê ŋacseŋomi ŋagêdô sêkwasiŋ lemeŋ atom, seŋ gêŋ paliŋ-paliŋgeŋ. 3 Parisai to Juda samob seŋ gêŋ atom e sêkwasiŋ lemeŋ su acgom, gebe têdaguc lau ŋanô nêŋ ŋagôliŋ.* 4 Ma embe aŋga gamêŋ têtulu gêŋŋa sêmêŋ, naŋ sêniŋ gêŋ atom e sêliŋ bu su acgom. Ma ŋagôliŋ laŋgwa ŋagêdô taêsam gêc, taŋ têdaguc gêwiŋ amboac sêkwasiŋ suc to laclu ma ku.

5 Amboac tonaŋ tec Parisai to biŋsutau têtu kênac eŋ gebe “Amboac ondoc, aômnêm ŋacseŋomi têdaguc lau ŋanô nêŋ ŋagôliŋ atom, sêkwasiŋ lemeŋ atom ma seŋ gêŋ.” 6 Tec eŋ kêsôm gêdêŋ êsêac gebe “Jesaia geoc biŋ lasê jagêdêŋgoc kêpi amac dansaŋtêna amboac teto gêc gebe

‘Lau tonec tetoc aê sa ŋa gêdôŋôlicgeŋ,
mago nêŋ ŋalêlôm gêmoa jaêc aê.
7 Êsêac sêjam sakiŋ aê kwalec
gebe biŋsu, taŋ êsêac têdôŋ naŋ, ŋamalacnêŋ biŋ ŋaômageŋ.’
8 Anôtônê biŋsu naŋ amac awi siŋ su, ma ŋamalacnêŋ ŋagôliŋ laŋgwa tec akôc tôŋ.”

9 Ma kêsôm gêdêŋ êsêac gebe “Anôtônê biŋsu tec abanac e ŋapep sawa gebe amansaŋ taôm nêm ŋagôliŋ laŋgwaŋa. 10 Mose kêsôm gebe ‘Otoc tamam agêc tênam sa. Ŋac teŋ embe êsôm biŋ sec êpi têna me tama, naŋ sênac eŋ êndu.’ 11 Mago amac tec asôm gebe ‘Ŋac teŋ embe êsôm êndêŋ têna me tama gebe Aêŋoc gêŋ, taŋ taêm kêka amoa naŋ, Korban,’ ŋam gebe jakêŋ êndêŋ Anôtô, 12 go anac jao eŋ gebe ênam têna me tama sa êtiam atom. 13 Amac ajam Anôtônê biŋ auc ŋa taôm nêm ŋagôliŋ laŋgwa, taŋ adôŋ gelom-gelom naŋ, ma ajam gêŋ ŋagêdô ôkwi gêwiŋ.”

Geŋ taŋ gêgôm ŋamalac kêtu sec

(Mat 15:10-11, 15-20)

14 Go Jesu gêmôêc lau dêdêŋ eŋ sêja kêtiam ma kêsôm gêdêŋ êsêac gebe “Samob aŋô aêŋoc biŋ ma nêm kauc êsa. 15 Gêŋ dêmôêŋa teŋ embe êsêp ŋamalacnê ŋalêlôm êna, oc êŋgôm eŋ êtu sec atom. Mago gêŋ, taŋ kêsa aŋga ŋamalac gêmêŋ naŋ, tec gêgôm eŋ kêtu sec.” [ 16 Ŋac teŋ nê taŋasuŋ êŋôŋa êmbe ênêc, naŋ êŋômaŋ.]

17 Ma gêdêŋ taŋ gêwi lau siŋ kêsô andu gêja naŋ, ênê ŋacseŋomi têtu kênac biŋgôliŋ tau ŋam gêdêŋ eŋ. 18 Ma eŋ kêsôm gêdêŋ êsêac gebe “Ma amac tonec nec, nêm kauc kêsa atom amboac tonaŋ me. Ajala atom me. Gebe gêŋ samob, taŋ aŋga dêmôêŋa êsêp ŋamalac êna naŋ, oc êŋgôm eŋ êtu sec atom, 19 gebe kêsêp ênê ŋalêlôm gêja atom, kêsêp ŋatêtacŋageŋ gêja e gê su kêtôm gêgôm-gêgôm.” Tec Jesu gêwa gêŋ taniŋŋa samob sa gebe ŋajam. 20 Ma kêsôm gebe “Tageŋ gêŋ, taŋ kêsa aŋga ŋamalacnê naŋ, tec gêgôm ŋamalac kêtu sec. 21 Gebe taêŋ gêjam biŋ sec kêsa aŋga ŋamalacnêŋ ŋalêlôm, biŋ mockaiŋŋa, geŋgeŋ, sêjac ŋamalac êndu, 22 dêdim sêmôcwalô gêŋgic, mateŋ katu, sêgôm sec ŋawaô, biŋdansaŋ, wauc-wauctêna, mateŋ daŋgucboa, sêsôm biŋ alôb-alôb, tetoc tauŋ sa ma biŋ meloc. 23 Gêŋ sec samob tonaŋ ŋai tec kêsa aŋga ŋalêlôm ma gêgôm ŋamalac kêtu sec.”

Awê teŋ kêkêŋ gêwiŋ ŋajaŋa

(Mat 15:21-28)

24 Go Jesu gêdi aŋga tonaŋ gêja gamêŋ Turuŋa. Ma kêpi andu teŋ gêja ma gebe ênam tau aucgeŋ e gêgôm jageo. 25 Ma awê teŋ, taŋ latuo sauŋ ŋalau ŋatêmui gêgôm eŋ naŋ, gêŋô eŋ ŋawae ma sebeŋ gêja gêu tau gêc eŋ akaiŋŋa. 26 Awê tau eŋ Heleno, têna kêkôc eŋ aŋga Suropoinikiaŋa. Eŋ keteŋ Jesu gebe êtiŋ ŋalau sec aŋga latuonê êsa êna. 27 Mago Jesu kêsôm gêdêŋ eŋ gebe “Ondecgeŋ, ŋapalê sêniŋ nêŋ gêŋ e êôc êsêac tôŋ acgom. Embe takôc ŋapalênêŋ mo su ma tambaliŋ êndêŋ kêamlatu, oc ŋajam atom.” 28 Tec awê tau gêjô eŋ awa gebe “Apômtau, mago kêamlatu seŋ ŋapalênêŋ mo ŋapopoc sêmoa tebo ŋalabugoc.” 29 Ma Jesu kêsôm gêdêŋ eŋ gebe “Kêtu biŋ tonaŋŋa tec ôna. Ŋalau sec kêsa aŋga latômonê gêja su.” 30 Ma eŋ gêmu gêja nê andu e gêlic ŋapalêo gêc ma ŋalau sec kêsa gêja su.

Taŋasuŋbic to awamê ŋajam kêsa

31 Ma Jesu gêwi gamêŋ Turuŋa siŋ kêtiam kêsa Sidonŋa e jagêô lasê Malaclemeŋlu ŋagamêŋ gêc bugêjactoŋ Galilaiaŋa. 32 Go sêkôc taŋasuŋbic to nê bi ŋ kwackwac dêdêŋ eŋ sêja ma teteŋ eŋ gebe êkêŋ lêma ênsac eŋ. 33 Tec Jesu kêkôc eŋ su aŋga launêŋ jasêkô tauŋŋa, go kêkêŋ lêmalatu kêsô eŋ taŋasuŋ ma kêkasôp to kêmoasac eŋ imbêla. 34 Go mata gedec undambê e kêsê awa su ma kêsôm gêdêŋ eŋ gebe “Epata,” gebe “Ôpoa lasê.” 35 Tec taŋasuŋ kêpoa lasê ma imbêla kêtu goloŋ e kêsôm biŋ ŋaŋêŋ kêsa, 36 ma Jesu gêjac jao gebe sêsôm ŋawae êndêŋ lau atom. Eŋ gêjac jao gêmoa, tageŋ êsêac sêjac miŋ biŋ tau kêtu tapa-tapa sêjac ŋawaegeŋ. 37 Lau sêŋac lemeŋ ŋanô ma sêsôm gebe “Eŋ gêgôm gêŋ samob ŋajam. Taŋeŋsuŋbic sêŋô biŋ ma aweŋmê sêsôm biŋ lasê.” ^{▼▼ Asam biŋ, taŋ gec Mat 15:2}